រដ្ឋមន្រ្តីក្រសួងទេសចរណ៍ ដឹកនាំគណៈប្រតិភូ ចូលរួមទស្សនាពន្លាជាតិកម្ពុជា នៅទីក្រុងឌុយបៃ សហភាពអារ៉ាប់រួម
ក្នុងឱកាសចូលរួមកិច្ចប្រជុំសន្និបាតលើកទី៤០ របស់ក្រុមប្រឹក្សាអូឡាំពិកអាស៊ី នាព្រឹកថ្ងៃទី២២ ខែវិច្ឆិកា ឆ្នាំ២០២១ ឯកឧត្តម ថោង ខុន រដ្ឋមន្រ្តីក្រសួងទេសចរណ៍ បានបន្តដឹកនាំគណៈប្រតិភូកម្ពុជា មកចូលរួមគាំទ្រ និងទស្សនាពន្លាជាតិកម្ពុជា ដែលកំពុងរៀបចំតាំងបង្ហាញក្នុងព្រឹត្តិការណ៍ពិព័រណ៍ពិភពលោក រយៈពេល ៦ខែ នៅក្នុងទីក្រុងឌុយបៃ សហភាពអារ៉ាប់រួម។ ក្នុងដំណើរទស្សនកិច្ចនេះ មានការចូលរួមដោយ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ ឯកឧត្តម វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មការជាតិអូឡាំពិកកម្ពុជា ព្រមទាំងមន្រ្តីជាន់ខ្ពស់មួយចំនួនទៀត នៃក្រសួងទេសចរណ៍ និងគណៈអភិបាលរាជធានីភ្នំពេញ។
ឯកឧត្តមរដ្ឋមន្រ្តី ថោង ខុន បានមានប្រសាសន៍កោតសរសើរយ៉ាងខ្លាំងអំពីពន្លាជាតិកម្ពុជាយើង ដែលបានរៀបចំឡើងតាមរចនាបថខ្មែរ ដោយច្របាច់បញ្ចូលគ្នារវាងវប្បធម៌នាសម័យបុរាណ និងការរីកចម្រើននាសម័យទំនើបបច្ចុប្បន្ន។ ឯកឧត្តមបានបញ្ជាក់ថា ការចូលរួមរបស់កម្ពុជាក្នុងព្រឹត្តិការណ៍ពិព័រណ៍ពិភពលោកនៅពេលនេះ គឺមានសារៈប្រយោជន៍ខ្លាំងណាស់ ក្រៅពីការបង្កើតទំនាក់ទំនងល្អជាមួយភាគីម្ចាស់ផ្ទះសហភាពអារ៉ាប់រួម ក៏ដូចជាជាមួយបណ្តាប្រទេសអ្នកចូលរួមនានា កម្ពុជាមានឱកាសផ្សព្វផ្សាយអំពីតំបន់ទេសចរណ៍កម្ពុជា វប្បធម៌កម្ពុជាដ៏រុងរឿង ផលិតផលសក្តានុពលកម្ពុជា និងសមិទ្ធផលធំៗជាច្រើនរបស់រាជរដ្ឋាភិបាលកម្ពុជា ជាពិសេសវិស័យពាណិជ្ជកម្ម និងវិនិយោគ។ ឯកឧត្តមរដ្ឋមន្រ្ដីមានជំនឿយ៉ាងមុតមាំថា តាមរយៈព្រឹត្តិការណ៍កម្រិតពិភពលោក និងស្របពេលដែលព្រះរាជាណាចក្រកម្ពុជាបានបើកឱ្យភ្ញៀវទេសចរចូលមកកាន់កម្ពុជាដោយមិនតម្រូវឱ្យធ្វើចត្តាឡីស័កនោះ កម្ពុជា នឹងទទួលបាននូវកំណើនភ្ញៀវទេសចរអន្តរជាតិយ៉ាងច្រើនចាប់ពីចុងខែវិច្ឆិកានេះតទៅ។
ឯកឧត្តមរដ្ឋមន្រ្ដីក៏បានថ្លែងអំណរគុណដល់គណៈកម្មការរៀបចំពិព័រណ៍ ដែលបានជួយសម្របសម្រួល និងទទួលស្វាគមន៍គណៈប្រតិភូកម្ពុជាយ៉ាងកក់ក្តៅ និងជូនពរដល់ក្រុមការងារប្រចាំការនៅពន្លាជាតិកម្ពុជា ឱ្យទទួលជោគជ័យក្នុងការប្រតិបត្តិការងារប្រចាំថ្ងៃក្នុងព្រឹត្តិការណ៍ពិព័រណ៍ពិភពលោកនៅទីក្រុងឌុយបៃនេះ៕ដោយ រិទ្ធី ប្រភព៖ ក្រសួងទេសចរណ៍
