ឆ្លងប្រព័ន្ធភ្លើងឆេះអេស្កាទ័រមួយគ្រឿងហ្មត់ ពេលកំពុងកាយដីស្រែ
ខេត្តបាត់ដំបង ៖ អេស្កាវិទ័រមួយគ្រឿងត្រូវអគ្គិភ័យឆេះខូចខ្ទេចខ្ទីរអស់សល់តែដែក ដែលបង្កឡើយដោយការឆ្លងប្រព័ន្ធភ្លើង ពេលកំពុងកាយបកដីស្រែ កាលពីវេលាម៉ោង២រសៀលថ្ងៃទី១៩ មីនា នៅក្នុងភូមិបឹងរាំង សង្កាត់អូរម៉ាល់ ក្រុងបាត់ដំបង តែមិនបង្កគ្រោះថ្នាក់ដល់អ្នកបើកបរទេ។ សេចក្ដីរាយការណ៍បានឱ្យដឹងថា អគ្គិភ័យនេះបានកើតឡើងពេលដែលកំពុងកាយបកដីស្រែ ស្រាប់តែសុខៗហុយផ្សេង និងក្លាយជាអណ្ដាតភ្លើងឆាបឆេះមួយរំពេចតែម្ដង ។ អ្នកបើកបរបានព្យាយាមពន្លត់តែមិនអាចគ្រប់គ្រងបាន ទើបទាក់ទងសុំជំនួយពីសមត្ថកិច្ចឱ្យជួយបញ្ជូនរថយន្តពន្លត់អគ្គីភ័យ ដើម្បីអន្តរាគមន៍ តែអគ្គិភ័យនៅតែអាចលេបត្របាក់គ្រឿងក្នុងអេស្កាទ័រនេះអស់គ្មានសល់ដដែល ជាពិសេស គ្រឿងកៅស៊ូ ។ បើតាមម្ចាស់គ្រឿងចក្របានប្រាប់សមត្ថកិច្ចថា អគ្គិភ័យបានកើតឡើងនៅពេលគាត់កំពុងកាយបកដីស្រែ។ ពេលនោះ ស្រាប់តែមានធំឈ្ងៀមផ្សេង ដែលទុស្សេប្រព័ន្ធភ្លើង ហើយភ្លាមនោះក៏មានអណ្ដាតភ្លើងឆាបឆេះឡើងតែម្ដង ។ គាត់បាននិយាយទៀតថា គាត់បានព្យាយាមពន្លត់ តែកម្លាំងភ្លើងហាក់មិនថមថយទេ ទើបគាត់ទំនាក់ទំនងសុំអន្តរាគមន៍ពីសមត្ថកិច្ច ដើម្បីសុំជំនួយរថយន្តពន្លត់អគ្គិភ័យ ។ សមត្ថកិច្ចបានបញ្ចេញរថយន្តទឹកពន្លត់អគ្គិភ័យមួយគ្រឿង ដើម្បីជួយអន្តរាគមន៍ តែយ៉ាងណា បានត្រឹមជួយបាញ់ពន្លត់ប៉ុណ្ណោះ ខណៈគ្រឿងក្នុងគ្រឿងចក្រនេះ ត្រូវភ្លើងឆេះស្ទើរអស់ទៅហើយ ។ បើពិនិត្យជាក់ស្ដែង អេស្កាទ័រនេះ នៅសល់តែដែកខាងក្រៅ រីឯគ្រឿងក្នុងដែលមានជាតិកៅស៊ូ បានរងការខូចខាតប្រើការលែងកើតទៅហើយ៕ សម្រួលដោយ ទៀង បុណ្ណរី
