រ.បួ.សធ្ងន់ស្រាល៣នាក់ករណីផ្ទុះរថយន្តក្រុង៤គ្រឿងនៅចំណតមុខប្រាសាទអង្គរវត្ត
ខេត្តសៀមរាប៖ មានករណីផ្ទុះរថយន្តក្រុងប្រភេទពីរជាន់ ចំនួន៤គ្រឿងម៉ាក Hyundai នៅព្រឹកថ្ងៃទី០៥ខែមីនា ដែលបណ្ដាលឱ្យមនុស្ស៣នាក់បានរងរបួសធ្ងន់និងស្រាល។ នេះបើតាមអធិការដ្ឋាននគរបាលក្រុងសៀមរាប។ តាមរយៈការផ្ដល់បទសម្ភាសជាមួយ អាជ្ញាធរក្រុងសៀមរាបបានបញ្ជាក់ថា មនុស្សដែលរងរបួសទាំង៣នាក់ គឺមានម្នាក់រងរបួសធ្ងន់ និង២នាក់ទៀតរងរបួសស្រាល។ បច្ចុប្បន្នអ្នកទាំង៣ត្រូវបានបញ្ជូនទៅសង្រ្គោះនៅមន្ទីរពេទ្យអស់ហើយ។ អាជ្ញាធរបានឱ្យដឹងបន្ថែមថា ករណីផ្ទុះរថយន្តខាងលើ បានកើតឡើងនៅចំណតរថយន្តខាងមុខបរិវេណប្រាសាទអង្គរវត្ត ដែលស្ថិតនៅភូមិត្រពាំងសេះ សង្កាត់គោកចក ក្រុងសៀមរាប។ យ៉ាងណា គេមិនទាន់អាចកំណត់មុខសញ្ញាដែលនាំឱ្យផ្ទុះរថយន្តខាងលើបាននៅឡើយទេ ដោយអាជ្ញាធរអះអាងថាហេតុការណ៍នេះ ទើបតែកើតឡើងភ្លាមៗមិនទាន់សន្និដ្ឋានបាន និងកំពុងធ្វើកោសល្យវិច័យនៅឡើយ។ គួរឱ្យដឹងថា មួយរយៈចុងក្រោយនេះគេតែងឃើញមានករណីឆេះនិងផ្ទុះរថយន្តជារឿយៗ ពិសេសនៅតាមផ្លូវល្បឿនលឿន។ ជាក់ស្ដែង កាលពីថ្ងៃទី០៤ ខែមីនា មានរថយន្តម៉ាក Range Roverមួយគ្រឿងបានឆាបឆេះលើផ្លូវល្បឿនលឿន នៅត្រង់ចំណុចគីឡូម៉ែត្រលេខ ១៣៤-១៣៥ ម្តុំស្ទឹងឆាយ ស្ថិតក្នុងស្រុកកំពង់សិលា ខេត្តព្រះសីហនុ ដោយសារឆ្លងប្រព័ន្ធភ្លើង ប៉ុន្តែគ្រានោះពុំមានអ្នកស្លាប់រងរបួសនោះដែរ៕ សម្រួលដោយ ទៀង បុណ្ណរី
