យុវជនម្នាក់បា.ត់ខ្លួនច្រើនថ្ងៃ ក្រោយប្រាប់សង្សារថា «សុំបែក និងឱ្យនាងយកប្តី ឬសង្សារថ្មីទៀតចុះ»
រាជធានីភ្នំពេញ ៖ យុវជនម្នាក់បានមានទំនាក់ទំនងស្នេហាជាមួយនឹងស្ត្រីម្នាក់រយៈពេលជាច្រើនខែកន្លងមកហើយ ប៉ុន្តែពុំដឹងថាមានរឿងអ្វីកើតឡើងនោះទេ ស្រាប់តែនៅពេលថ្មីៗនេះសុំនាងជាសង្សារបែកគ្នា និងសន្យាថាឲ្យនាងយកប្ដីឬសង្សារថ្មីទៀតចុះខ្លួនមិនរករឿងឡើយ ។ លុះកន្លះខែក្រោយមក យុវជនខាងលើបានជិះម៉ូតូ១គ្រឿងថាយកទៅលាងសម្អាត ដើម្បីជិះធ្វើដំណើរទៅស្រុកកំណើតនៅឯខេត្តកំពត ក៏ស្រាប់តែបាត់ខ្លួនរហូតគ្មានដំណឹងសូន្យឈឹង បើគិតមកដល់ពេលនេះបានបាត់ខ្លួនអស់រយៈពេល៦ថ្ងៃមកហើយ មិនឃើញត្រឡប់ទៅផ្ទះវិញឡើយ។ ក្រុមគ្រួសារមានការព្រួយបារម្ភយ៉ាងក៏បាននាំគ្នាតាមរកគ្រប់កន្លែង ប៉ុន្តែមិនឃើញសោះ រហូតដល់វេលាម៉ោង១២ថ្ងៃត្រង់ថ្ងៃទី២៦ ខែធ្នូ ឆ្នាំ២០២៣ ឪពុកម្ដាយបានកាន់រូបថតកូនប្រុសដែលបា.ត់ខ្លួនខាងលើទៅដាក់ពាក្យបណ្ដឹងនៅប៉ុស្តិ៍រដ្ឋបាលនគរបាលកន្ទោក ខណ្ឌកំបូល រាជធានីភ្នំពេញ ដើម្បីសុំឲ្យឲ្យជួយអន្តរាគមន៍ស្រាវជ្រាវតាមស្វែងរកកូនគាត់ផង។ យុវជនដែលកំពុងតែបាត់ខ្លួនខាងលើនោះឈ្មោះឡូយ សាមីឌី អាយុ១៨ឆ្នាំ មុខរបរជាងសំណង់ ស្នាក់នៅធ្វើការនៅឯខេត្តព្រះវិហារ មានម្ដាយឈ្មោះធន សារ៉ាន់ អាយុ៤០ឆ្នាំ មុខរបរកសិករ និងឪពុកឈ្មោះមា ធឿន អាយុ៥៣ឆ្នាំ មុខរបរកសិករ ។ គ្រួសារមួយនេះមានទីលំនៅអចិន្ត្រៃយ៍នៅភូមិពន្លៃ ឃុំដានគោម ស្រុកអង្គរជ័យ ខេត្តកំពត ចំណែកឯនាងជាសង្សារឈ្មោះលុយ អាយុ១៧ឆ្នាំ ស្នាក់នៅផ្ទះជួលនៅក្នុងបុរីសែនមនោរម្យ ភូមិកន្ទោកខាងជើង សង្កាត់កន្ទោក ខណ្ឌកំបូល រាជធានីភ្នំពេញ ។ អ្នកស្រីធន សារ៉ាន់ ដែលត្រូវជាម្ដាយរបស់យុវជនបាត់ខ្លួន បានរៀបរាប់ឱ្យដឹងថា គាត់បានដឹងថាកូនប្រុសគាត់មានសង្សារយូរហើយ ប៉ុន្តែពេលអ្នកទាំង២បែកគ្នា គាត់មិនបានដឹងឡើយ គាត់ស្មានថាកូននៅស្រលាញ់គ្នាដូចមុន។ ដោយឡែកកាលពីថ្ងៃទី១៩ ខែធ្នូ ឆ្នាំ២០២៣ កូនប្រុសរបស់គាត់បានធ្វើដំណើរចេញពីខេត្តព្រះវិហារមកផ្ទះជួលកូនច្បងរបស់គាត់ម្នាក់ទៀតនៅក្នុងបុរីសែនមនោរម្យ ភូមិកន្ទោកខាងជើង សង្កាត់កន្ទោក ដោយមកដល់នាវេលា្ងចថ្ងៃដដែលនោះ ។ ស្ត្រីជាម្តាយបានឱ្យដឹងបន្តទៀតថា លុះដល់ព្រឹកថ្ងៃទី២០ ខែធ្នូ ឆ្នាំ២០២៣ កូនប្រុសរូបនេះក៏បានជិះម៉ូត១គ្រឿង ម៉ាកហុដាឌ្រីម ធុនសេ១២៥ ពណ៍ខ្មៅ ពាក់ស្លាកលេខភ្នំពេញ1HM-7573 យកទៅលាងម៉ូតូសម្អាត ដើម្បីជិះធ្វើដំណើរទៅកាន់ស្រុកកំណើតនៅខេត្តកំពត។ បន្ទាប់មកក៏ស្រាប់តែបាត់ខ្លួនរហូតតែម្ដង មិនឃើញត្រឡប់មកផ្ទះជួលវិញទេ ហើយក៏មិនឃើញទៅដល់ខេត្តកំពតនោះឡើយ ដែលជាហេតុធ្វើឲ្យក្រុមគ្រួសារមានការព្រួបារម្ភយាំងខ្លាំងនិងបាននាំគ្នាតាមរកគ្រប់ច្រកល្ហកក៏នៅតែមិនឃើញទៀត។ ស្ត្រីជាម្ដាយបានរៀបរាប់ប្រាប់បន្តទៀតថា កន្លងមក កូនគាត់ក៏ធ្លាប់បាត់ខ្លួនបែបនេះ២ទៅ៣ថ្ងៃដែរ ហើយពួកគាត់បានតាមរកឃើញជាបន្តបន្ទាប់នៅបន្ទប់ជួលដែលនាងជាសង្សារជួលស្នាក់នៅ ។ ដោយឡែកកាលពីថ្ងៃអាទិត្យ ទី២៤ ខែធ្នូ កន្លងមកនេះ ពួកគាត់បានទៅរកនៅទីនោះទៀត ប៉ុន្តែពេលទៅដល់ត្រូវនាងសង្សារប្រាប់ថា «បងសាមីឌីបានសុំខ្ញុំបែកគ្នា ដោយគ្មានមូលហេតុអស់រយៈពេលកន្លះខែមកហើយ។ មិនតែប៉ុណ្ណោះបានសន្យាជាមួយខ្ញុំថា ឲ្យខ្ញុំយកប្ដីឬសង្សារថ្មីទៀតចុះគាត់មិនរករឿងខ្ញុំនោះឡើយ បន្ទាប់មកគាត់ក៏បានចាកចេញទៅបាត់ទៅ ហើយខ្ញុំព្យាយាមខលរកគាត់ជាច្រើនដងដើម្បីនិយាយគ្នាដែរ ប៉ុន្តខលមិចូលទាក់ទងមិនបានសោះ»។ អ្នកម្ដាយខាងលើបានបញ្ជាក់ប្រាប់ឲ្យដឹងបន្ថែមទៀតថា គាត់បានដឹងថាកូនស្រលាញ់គ្នាជាគូសង្សារយូរមកហើយ ប៉ុន្តគាត់មិនបានដឹងថាកូនប្រុសគាត់សុំសង្សារបែកគ្នាបែបនេះទេ ទាល់តែនាងប្រាប់ទើបដឹង។បើគិតរហូតមកដល់ពេលនេះគាត់និងក្រុមគ្រួសារបានតាមស្វែងរកកូនប្រុសរយៈពេល៦ថ្ងៃហើយ តែសម្បីដំណឹងបន្តិចក៏គ្មានផង ពុំដឹងថាកូនប្រុសមានសុខទុក្ខយ៉ាងណានោះទេ ពិតជាព្រួយបារម្ភខ្លាំងណាស់ ៕ សម្រួលដោយ ទៀង បុណ្ណរី
