ខ្យល់ព្យុះរដូវរំហើយបោកបក់យ៉ាងខ្លាំងនៅស្រុកព្រៃនប់ និងបំផ្លាញផ្ទះរាប់រយខ្នង
ខេត្តព្រះសីហនុ ៖ មន្ត្រីមូលដ្ឋានបានឱ្យដឹងនៅព្រឹកថ្ងៃទី២២ ធ្នូ ឆ្នាំ២០២៣នេះថា ខ្យល់ព្យុះរដូវរំហើយបានចាប់ផ្តើមបោកបក់ពីជើងភ្នំកំចាយ តាំងពីយប់រំលងអាធ្រាត្រ រហូតមកដល់ព្រឹកនេះស្ថានភាពខ្យល់បក់បោកតាមបណ្តាឃុំមួយចំនួន ពិសេសបណ្តាឃុំជាប់ផ្លូវជាតិលេខ៣ ស្ថិតក្នុងស្រុកព្រៃនប់ ខេត្តព្រះសីហនុ កំពុងរងឥទ្ធិពល បណ្ដាលឱ្យប៉ះពាល់ផ្ទះប្រជាពលរដ្ឋនៅតាមឃុំជាប់ផ្លូវជាតិលេខ៣ មានឃុំសាមគ្គី ឃុំទឹកល្អក និងឃុំទឹកថ្លា រាប់សិបខ្នង រងផលប៉ះពាល់ ដែលភាគច្រើនសុទ្ធសឹងតែប៉ើងដំបូល ។ គិតមកត្រឹមវេលាម៉ោងជាង១១ព្រឹកថ្ងៃដដែលនេះ នៅឃុំទឹកថ្លា ខ្យល់ព្យុះបានបោកបក់ប៉ើងដំបូលផ្ទះប្រជាពលរដ្ឋជាង៤០០ខ្នង ក្នុងនោះដួលរលំមួយខ្នង នៅឃុំសាមគ្គី ខ្យល់ព្យុះបានបោកបក់ប៉ើងដំបូលផ្ទះខូចខាតចំនួន៧៦ខ្នង នៅឃុំទឹកល្អក់ ខ្យល់ព្យុះបានបោកបក់ប៉ើងដំបូលផ្ទះខូចខាតចំនួន ៤៣ខ្នង។ ទាក់ទិននឹងខ្យល់ព្យុះបោកបក់ខាងលើនេះ គេនៅមិនទាន់ដឹងថា ស្ថានភាពខ្យល់រដូវនេះមានរយៈពេលខ្លី ឬយូរថ្ងៃ ឬអាចបង្កជាបញ្ហាប៉ះពាល់បន្ថែមកម្រិតណានៅឡើយ ប៉ុន្តែជាមួយគ្នានេះ អាជ្ញាធរបានអំពាវនាវដល់ប្រជាពលរដ្ឋឱ្យបង្កើនការប្រុងប្រយត្ន័ ក្នុងនោះអាជ្ញាធរនិងសមត្ថកិច្ចគ្រប់មូលដ្ឋានបន្តតាមដានសភាពការណ៍ ដើម្បីជួយប្រជាពលរដ្ឋក្នុងករណីខ្យល់រដូវរំហើយចុងឆ្នាំនេះមានឥទ្ធិពលខ្លាំង ។ សូមបញ្ជាក់ថា នេះជាខ្យល់រដូវរំហើយដែលតែងតែកើតមានជារៀងរាល់ឆ្នាំនៅក្នុងតំបន់ឃុំខាងលើ ក្នុងស្រុកព្រៃនប់ ខេត្តព្រះសីហនុ ៕ សម្រួលដោយ ទៀង បុណ្ណរី
