ផ្អើលបុរសម្នាក់បើកឡានទំនើបលោ.តទឹកស្ពានកោះនរា តែសន្តិសុខថាឃើញដើរចេញពីក្រោមស្ពាននិងទៅជាមួយគ្រួសារបាត់
រាជធានីភ្នំពេញ ៖ មានការភ្ញាក់ផ្អើលមួយបានកើតឡើង ដោយសង្ស័យថាមានបុរសម្នាក់ជិះរថយន្តស៊េរីទំនើបមកឈប់កណ្តាលស្ពានកោះនរា ហើយលោតទឹកបាត់ កាលពីវេលាម៉ោង១និង១៥នាទីរំលងអធ្រាត្រឈានចូលថ្ងៃទី១៥ ខែធ្នូ ឆ្នាំ២០២៣ នៅលើស្ពានកោះនរា ស្ថិតក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។ យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញបុរសម្នាក់ស្លៀកពាក់អាវពណ៌បៃតង វ័យជាង៣០ឆ្នាំ មានកម្ពស់ជាង១,៧០ម៉ែត្រ គាត់បានឈរចុចទូរស័ព្ទកណ្តាលស្ពានកោះនរា ដោយផ្អែកបង្កាន់ដៃស្ពានផងដែរ។ អ្នកឃើញហេតុការណ៍បានបន្តថា គេបានឃើញរថយន្តស៊េរីទំនើប១គ្រឿង ពណ៌ខ្មៅ ម៉ាកអឹមជី(MG) ដែលមានស្លាកលេខ ភ្នំពេញ 2BS-8007 ចតចោលកណ្តាលស្ពានក្បែរបុរសខាងលើផងដែរ។ លុះដល់ម៉ោង១និង២០នាទីរំលងអធ្រាត្រថ្ងៃខែឆ្នាំដដែល ស្រាប់តែឃើញមានមនុស្សច្រើននាក់ឈរចោមរោមក្បែររថយន្ត១គ្រឿងនោះ ដោយខ្លះកាន់បង្កាន់ដៃស្ពានរួចអើតមើលទៅទឹកទន្លេ ខ្លះទៀតក៏ឈប់មើល ស្រាប់តែឃើញស្បែកជើងចំពាម១គូ នៅកន្លែងបុរសដែលឈរនោះ ក៏សង្ស័យថាបុរសនោះលោតទឹកតែម្តង។ ក្រោយទទួលដំណឹងនេះភ្លាម សមត្ថកិច្ចប៉ុស្តិ៍និរោធ និងសន្តិសុខប្រចាំនៅកោះនរាបានទៅដល់ទីតាំងកើតហេតុ ព្រមទាំងបានអោយកម្លាំងចេញទូកល្បឿនលឿន ឬអូប័រ៣គ្រឿង ទៅកាន់ក្រោមស្ពានដើម្បីស្វែងរក តែមិនឃើញមនុស្សនោះទេ។ ចុងក្រោយ នាវេលាម៉ោង៣ទៀបភ្លឺថ្ងៃខែឆ្នាំដដែល សន្តិសុខដែលអង្គុយយាមក្បែរគល់ស្ពានកោះនរាបានអោយដឹងថា នៅពេលមនុស្សទៅអស់ សមត្ថកិច្ច និងអ្នកសារព័តមានទៅបាត់អស់ ស្រាប់តែ គាត់បានឃើញបុរសរូបនោះដើរចេញពីក្រោមស្ពាន រួចក៏ឡើងលើរថយន្តហើយបើកត្រឡប់ទៅផ្ទះវិញជាមួយក្រុមគ្រួសារបាត់ទៅ ៕ សម្រួលដោយ ទៀង បុណ្ណរី
