UNបានបើក មហាសន្និបាតស្វែងរកបទឈប់បាញ់ជាបណ្តោះអាសន្ន រវាងអ៊ីស្រាអែល និងក្រុមហាម៉ាស
នៅមហាសន្និបាតអង្គការសហប្រជាជាតិកាលពីថ្ងៃសុក្រទី២៧តុលា ប្រទេសជាច្រើនបានអំពាវនាវឱ្យមានបទឈប់បាញ់មនុស្សធម៌ជាបន្ទាន់រវាងអ៊ីស្រាអែល និងក្រុមសកម្មប្រយុទ្ធហាម៉ាសប៉ាឡេស្ទីន និងទាមទារឱ្យមានការផ្ដល់ជំនួយទៅកាន់តំបន់ហ្កាហ្សាដែលត្រូវឡោមព័ទ្ធ និងការការពារជនស៊ីវិល។ ស្ថាប័នដែលមានសមាជិកចំនួន១៩៣ បានអនុម័តសេចក្តីសម្រេចចិត្តដែលព្រាងដោយក្រុមនៃប្រទេសអារ៉ាប់ចំនួន ២២។ សេចក្តីសម្រេចដែលព្រាងដោយរដ្ឋអារ៉ាប់នេះទទួលបានសំឡេងគាំទ្រ១២០, ៤៥អនុប្បវាទ និង១៤សំឡេងរួមទាំងអ៊ីស្រាអែល និងសហរដ្ឋអាម៉េរិកប្រឆាំង។ ជាការពិតណាស់ មហាសន្និបាតបានបោះឆ្នោតបន្ទាប់ពីក្រុមប្រឹក្សាសន្តិសុខបានបរាជ័យចំនួនបួនលើកក្នុងរយៈពេលពីរសប្តាហ៍កន្លងមក ដើម្បីចាត់វិធានការរំលត់ភ្លើងសង្រ្គាមរវាងអ៊ីស្រាអែល និងពួកហាម៉ាស។ ទន្ទឹមគ្នានេះ កាណាដា បានព្យាយាមដើម្បីធ្វើវិសោធនកម្មសេចក្តីសម្រេចដើម្បីរួមបញ្ចូលការបដិសេធ និងការថ្កោលទោសចំពោះការវាយប្រហារភេរវកម្មដោយក្រុមហាម៉ាស [..] និងការចាប់ចំណាប់ខ្មាំង ត្រូវបានបរជ័យ ដោយមិនទទួលបានសំឡេងគាំទ្រពីរភាគបីដែលត្រូវការ ដោយទទួលបានសំឡេងគាំទ្រត្រឹមតែ ៨៨សំឡេង, ប្រឆាំង៥៥សំឡេង និង២៣អនុប្បវាទ។ មហាសន្និបាតនេះ បានអំពាវនាវឱ្យអ៊ីស្រាអែលបង្វែរកាណុងកាំភ្លើងដែលកំណត់គោលដៅលើជនជនស៊ីវិលនៅហ្កាហ្សា និងជំរុញឱ្យអ៊ីស្រាអែលផ្លាស់ទីជនស៊ីវិលទៅតំបន់ភាគខាងត្បូងនៃតំបន់នោះ។ ជាការពិតណាស់ អ៊ីស្រាអែលបានបញ្ជាឱ្យប្រជាជនប្រហែល១,១លាននាក់ នៅក្នុងតំបន់ហ្កាហ្សា ពោលគឺស្ទើរតែពាក់កណ្តាលនៃចំនួនប្រជាជនសរុបនៅតំបន់នេះឱ្យផ្លាស់ទីទៅភាគខាងត្បូងកាលពីថ្ងៃទី១២ ខែតុលា។ មហាសន្និបាតក៏បានបដិសេធយ៉ាងដាច់អហង្កាការប៉ុនប៉ងក្នុងការជម្លៀសជនស៊ីវិលប៉ាឡេស្ទីនដោយបង្ខំ។ លើសពីនេះ មហាសន្និបាតបានអំពាវនាវឱ្យមានការដោះលែងជាបន្ទាន់ និងដោយគ្មានលក្ខខណ្ឌនៃជនស៊ីវិលទាំងអស់ដែលកំពុងជាប់ការឃុំឃាំងដោយខុសច្បាប់។ ទោះជាយ៉ាងណា អ៊ីស្រាអែលបានច្រានចោលការអំពាវនាវឱ្យមានបទឈប់បាញ់ ខណៈទីក្រុងហ្ស៊េរុសសាឡិម ថា ប្រសិនបើខ្លួនទទួលយកបទឈប់បាញ់ នោះក្រុមហាម៉ាសនឹងទទួលបានផលប្រយោជន៍ជាក់ជាពុំខាន៕ សម្រួលដោយ ទៀង បុណ្ណរី
