ការដ្ឋានបូមខ្សាច់ខុសច្បាប់មួយកន្លែង ត្រូវបានប្រធានមន្ទីររ៉ែនិងថាមពល ខេត្តកំពង់ឆ្នាំងសហការជាមួយអាជ្ញាធរស្រុកទឹកផុស បានចុះធ្វើការណែនាំ និងផ្អាកសកម្មភាពទាំងស្រុង លើកលែងតែមានលិខិតអនុញ្ញាតទើបអាចបើកដំណើរការវិញបាន។

ចេញផ្សាយ ថ្ងៃទី 2 ខែ តុលា ឆ្នាំ 2025

ខេត្តកំពង់ឆ្នាំង: ទីតាំងការដ្ឋានបូមខ្សាច់ចំនួន១កន្លែង កំពុងតែបូមនិងសម្រុកដឹកយ៉ាងសកម្មត្រូវបានផ្អាកសកម្មភាពទាំងស្រុង ស្ថិតនៅភូមិ ក្រាំងស្គារ ឃុំក្រាំងស្គារ ស្រុកទឹកផុស ខេត្តកំពង់ឆ្នាំង ក្រោយមានអន្តរាគមន៍ពីលោកប្រធានមន្ទីររ៉ែនិងថាមពល ខេត្តកំពង់ឆ្នាំងសហការជាមួយអាជ្ញាធរស្រុកទឹកផុស ។
កន្លងមកគេឃើញថាការដ្ឋានមួយនេះ ទើបតែបើកដំណើរការមិនទាន់ដល់មួយអាទិត្យទេ តែសម្រុកដឹកយ៉ាងគគ្រឹកគគ្រេង យ៉ាងអាណាធិបតេយ្យ ទាំងដែរច្បាប់ទម្លាប់មិនទាន់មានផង ម្ចាស់អាជីវកម្មមួយនេះ ហាក់បីដូចជាមិនញញើតជាមួយនិងអាជ្ញាធរមូលដ្ឋានសោះ ។
លោក ប្រធានមន្ទីររ៉ែនិងថាមពល ខេត្តកំពង់ឆ្នាំង បានឲ្យដឹងថា ពិតជាមានការជីកនិងដឹកជញ្ជូនខ្សាច់ក្នុងទឹកដី ឃុំក្រាំងស្គារ ស្រុកទឹកផុស ពិតប្រាកដមែន ក្រោយឮដំណឹង លោកក៏បានចាត់ចែងមន្ត្រីក្រោមឱវាទចុះទៅអន្តរាគមន៍និងបានចុះផ្អាកការដ្ឋាននេះភ្លាមជាបន្ទាន់ លោកបានបញ្ជាក់បន្ថែមដែរថារថភ្លើងដែលដឹកខ្សាច់នោះ មិនមេនដឹកចេញពីការដ្ឋាននេះទាំងស្រុងនោះទេ
រថភ្លើងនោះបានដឹកខ្សាច់ចេញមកពីខេត្តពោធិ៍សាត់រួចក៏បានដាក់បន្ថែមខ្លះនៅទីនេះ ដើម្បីដឹកឆ្ពោះទៅខេត្តព្រះសីហនុ ។
លោកបានបញ្ជាក់បន្ថែមទៀតថា លោកក៏បានធ្វើការផាកពិន័យទៅលើម្ចាស់ការដ្ឋានខ្សាច់ ដែលគាត់ធ្វើការ បើកអាជីវកម្ម មុនថ្ងៃនៃការចេញលិខិតអនុញ្ញាតមុនរយៈពេល 7 ថ្ងៃ ហើយតាមមាត្រា៣៥ថ្មីនៃច្បាប់ ស្តីពីការធ្វើអាជីវកម្មលើវិស័យធនធានរ៉ែនៃព្រះរាជាណាចក្រកម្ពុជា លោកក៏បានធ្វើការផាកពិន័យដល់ម្ចាស់អាជីវកម្មក្នុងមួយថ្ងៃ១០លាន៥សែនរៀល ក្នុងរយៈពេល៧ថ្ងៃអស់១០លាន៥សែនរៀន ហើយចាស់ជីវកម្មគាត់ដឹងកំហុសហើយក៏គាត់ព្រមទទួលវិន័យនេះរួចហើយដែរ។