ឈ្មួញវៀតណាមមានតម្រូវការខ្ពស់ សម្រុកមកទិញស្រូវនិងចុងអង្ករខ្មែរដើម្បីនាំចេញបន្ត
ខេត្តស្វាយរៀង ៖ រយៈពេល២ខែនេះ ឈ្មួញវៀតណាមសម្រុកចូលមកទិញស្រូវ និងចុងអង្ករខ្មែរដល់ផែស្រូវប្រឡាយទាហាននៃស្លាបច្រកទ្វារព្រំដែនអន្តរជាតិព្រៃវ័ល្ល៍ ស្ថិតនៅភូមិព្រៃវ័ល្ល៍ ឃុំថ្មីស្រុកកំពង់រោទិ៍ ក្នុង១ថ្ងៃៗគឺមានកាណូតប៉ុកចៃធំៗ២០ទៅ៣០គ្រឿងចូលមកនាំស្រូវ និងចុងអង្ករចេញទៅប្រទេសវៀតណាម ចាប់ពី៦០០តោនទៅ១,០០០តោនក្នុង១ថ្ងៃ ។ បើតាមអាជីវកររកស៊ីនៅស្រុកកំពង់រោទិ៍បានប្រាប់សារព័ត៍មាន ធី អិន អឹម កាលពីព្រឹកថ្ងៃទី២៨ ធ្នូ ២០២៣ ថា ពួកគាត់សប្បាយចិត្តខ្លាំងណាស់ ដោយស្រូវវស្សាឆ្នាំនេះ មានទីផ្សារល្អតម្លៃមានលំនឹង ស្រូវK59 តម្លៃ១,២៥០ ទៅ១,៣០០រៀលក្នុង១គីឡូក្រាម ស្រូវក្រអូប ផ្កាម្លិះ ផ្ការំដួល ស្រូវសែនក្រអូប តម្លៃ១,៥០០រៀលក្នុង១គីឡូក្រាម ។ រីឯចុងអង្ករពួកគាត់មិនដឹងតម្លៃទេ ថៅកែគេប្រមូលទិញពីរាជធានីភ្នំពេញ និងតាមរោងម៉ាស៊ីននានាតាមបណ្តាខេត្ត ក្នុង១ថ្ងៃនាំចេញចុងអង្ករចំនួន២២៨តោនទៅប្រទេសវៀតណាម ។ ប្រភពបន្តថា ដោយប្រទេសវៀតណាមមានតម្រូវការស្រូវអង្ករនាំចេញទៅក្រៅប្រទេសច្រើន ឈ្មួញវៀតណាមបានសម្រុកចូលមកប្រមូលទិញស្រូវ និងចុងអង្ករខ្មែរយើងដល់ផែកាណូតប្រឡាយទាហានតែម្តង ។ ប្រភពបន្តថា ស្រូវមានតម្លៃថ្លៃគួរសមស្រូវ ស្រែ ស្រូវក្រសាំងទាប (បាយរឹង)វៀតណាមទិញក្នុង១គីឡូក្រាមតម្លៃ១,២៥០រៀល ស្រូវK59 តម្លៃ១,២៥០ រៀលទៅ១,៣០០រៀល ចំណែកស្រូវក្រអូប ដូចជា ស្រូវផ្កាម្លិះ ស្រូវផ្ការំដួល និងស្រូវសែនក្រអូប ក្នុង១គីឡូក្រាមតម្លៃ១,៥០០រៀល ។ ជាពិសេស ស្រូវវស្សាខ្មែរយើង មិនសូវប្រើប្រាស់ថ្នាំកសិកម្មច្រើន គឺមានបាញ់ថ្នាំសម្លាប់ស្មៅ (ឲ្យស្មៅងាប់) រួចភ្ជួរាស់ សាបព្រោះស្រូវ ហើយដាក់ជីតែម្តង រហូតទទួលផលច្រូតកាត់ ដូច្នេះអង្ករខ្មែរមានគុណភាពខ្ពស់ជាងអង្ករវៀតណាមដែលគេប្រើថ្នាំកសិកម្មច្រើន (ជី និងថ្នាំច្រើន) ។ ឈ្មួញវៀតណាមម្នាក់សុំមិនបញ្ចេញឈ្មោះបាននិយាយថា នៅប្រទេសវៀតណាមមានតម្រូវការស្រូវ/អង្ករ ខ្ពស់ ដើម្បីនាំចេញទៅក្រៅប្រទេស ហើយស្រូវខ្មែរផលិតអង្ករមានគុណភាពល្អ ទើបរដ្ឋាភិបាលវៀតណាមឱ្យអាជីវករប្រមូលទិញស្រូវខែ្មរ ដើម្បីផលិតអង្ករនាំចេញ។ ប្រភពបន្តថា ចំណែកចុងអង្ករ គឺមានថៅកែផ្សេងគេមិនបានប្រាប់តម្លៃទេ គឺក្រុមហ៊ុនវៀតណាមគេកុងត្រា ជាមួយក្រុមហ៊ុនខ្មែរ កំណត់ក្នុង១ថ្ងៃ ឫ២ថ្ងៃ ត្រូវការចុងអង្ករជាង២០០តោន យកទៅចូលរោងចក្រកែរឆ្នៃ ធ្វើជាចំណីអាហារ (ធ្វើនុំ បាញ់ស៊ុង បាញ់ហយ)សម្រាប់ផ្គត់ផ្គង់ក្នុងស្រុកនិងនាំចេញមកប្រទេសខ្មែរវិញ ។ ប្រភពបន្តទៀតថា ទោះបីបង់លុយក្បាលទូកក៏ដោយ អាជីវករវៀតណាមនៅតែចូលមកទទួលទិញស្រូវពីប្រជាកសិករខ្មែរដែរ ដោយស្រូវវៀតណាមមានតម្លៃខ្ពស់ ចំណែកស្រូវខ្មែរមានគុណភាពល្អ ជាពិសេសប្រទេសវៀតណាម មានតម្រូវការស្រូវសម្រាប់នាំចេញច្រើន ដូច្នេះ សំណូមពរសូមឲ្យសមត្ថកិច្ចច្រកទ្វារព្រំដែនអន្តរជាតិព្រៃវល្ល៍ជួយសម្រួលឲ្យអាជីវករវៀតណាមបានចូលមកទិញស្រូវអង្ករខ្មែរនាំចេញទៅប្រទេសវៀតណាមឲ្យកាន់តែបានច្រើន ។ ចំណែកមតិខ្លះលើកឡើងថា ស្រូវអង្ករខ្មែរមានគុណភាពខ្ពស់ វៀតណាមទិញស្រូវខ្មែរផលិតអង្ករនាំចេញទៅក្រៅប្រទេស។ ចំណែកអង្ករវៀតណាម សម្រាប់លក់ចែកចាយផ្គត់ផ្គង់ក្នុងប្រទេស ។ បើតាមសមត្ថកិច្ចបានឲ្យដឹងថា រយៈពេលជិត០២ខែមកនេះ គឺចាប់ពីពាក់កណ្តាលខែវិច្ឆិកា ២០២៣ មកដល់ថ្ងៃទី២៨ ធ្នូ ២០២៣នេះ តម្លៃស្រូវនៅមានលំនឹងល្អ ស្រូវវស្សាស្រូវក្រសាំងទាប តម្លៃ១,២៥០រៀលក្នុង១គីឡូក្រាមស្រូវក្រអូប ផ្កាម្លិះ ផ្ការំដួល និងស្រូវសែនក្រអូបតម្លៃ១,៥០០រៀលក្នុង១គីឡូក្រាម។ ប្រភពបន្តថា ជាមធ្យមឈ្មួញនាំស្រូវចេញទៅប្រទេសវៀតណាម ក្នុង១ថ្ងៃចាប់ពី៦០០តោន ទៅ៧០០តោន។ ហើយស្រូវវស្សា ក្នុងខេត្តស្វាយរៀងបានច្រូតកាត់ប្រមូលផលរួចអស់ហើយ ចំពោះស្រូវដែលកំពុងនាំចេញគឺនាំមកពីបណ្តាខេត្តនានា គឺខេត្តព្រៃវែង ខេត្តកំពង់ចាម ខេត្តកំពង់ធំ សៀបរាប និងខេត្តពោធិសាត់ផងដែរ៕ សម្រួលដោយ ទៀង បុណ្ណរី
