កសិករកចិញ្ចឹមក្របី ត្អួញត្អែរថា «ក្របីរាប់ពាន់ក្បាលលក់មិនចេញ អត់ទីផ្សារ»
ខេត្តស្វាយរៀង ៖ ប្រជាពលរដ្ឋដែលជាអ្នកចិញ្ចឹមសត្វគោ ក្របី មានការត្អូញត្អែថា «ឈ្មួញវៀតណាមឈប់មកទិញគោក្របីផ្ទាល់ហើយ បើមកទិញគឺទម្លាក់តម្លៃទាបជាងពីមុន»។ ខណៈករណីនេះ បានកើតឡើងកាលពីរសៀលថ្ងៃទី២២ ខែធ្នូ ឆ្នាំ២០២៣ ស្ថិតនៅក្នុងឃុំបាសាក់ ស្រុកស្វាយជ្រំ ខេត្តស្វាយរៀង។ បើតាមប្រជាកសិករអ្នកចេញ្ចឹមក្របី រស់នៅភូមិបាសាក់ ឃុំបាសាក់ ស្រុកស្វាយជ្រំ បានលើកឡើងបង្ហាញនូវការព្រួយបារម្ភថា «ដោយសារសត្វគោក្របីបច្ចុប្បន្នមានតម្លៃទាប ជាពិសេសសត្វក្របីរបស់ពួកគាត់ លក់មិនចេញ កកស្ទះរាប់ពាន់ក្បាល ដោយឈ្មួញទម្លាក់តម្លៃក្របី១ក្បាល (ក្របីកាច់ធ្មេញ១) តម្លៃត្រឹមតែ១លាន៥សែនរៀលប៉ុណ្ណោះ ហើយកាលពីមុន តម្លៃ១ក្បាល គឺចាប់ពី៣លានរៀល ទៅ៤លានរៀល»។ ប្រភពដដែលបន្តថា «ចំពោះសាច់គោ សាច់ក្របី គឺនៅមានតម្លៃខ្ពស់ដដែល បើងៀតក្របី គេលក់នៅទីផ្សារ១គីឡូ តម្លៃ១២ម៉ឺនរៀល ងៀតគោ១គីឡូតម្លៃ៨ម៉ឺនរៀល»។ ប្រជាកសិករជាអ្នកចិញ្ចឹមក្របី បានប្រាប់កោះសន្តិភាពឱ្យដឹងថា «ពួកគាត់រស់នៅជិតបន្ទាត់ព្រំដែន ហើយរំពឹងទៅលើការចិញ្ចឹមក្របី ដោយក្នុង១គ្រួសារ មានចាប់ពី២០ក្បាល រហូតដល់ទៅ៤៥ក្បាល ហើយគ្រួសារខ្លះចិញ្ចឹមចាប់ពី៥០ក្បាលទៅ១០០ក្បាល ខណៈពេលសត្វក្របីលក់មិនចេញ គ្មានទីផ្សារបែបនេះ គឺប៉ះពាល់ដល់ជីវភាពគ្រួសារយ៉ាងខ្លាំង។ ប្រជាពលរដ្ឋ ក៏បានសំណូមពរ សូមឲ្យរាជរដ្ឋាភិបាល មេត្តាពិនិត្យ ជួយរកទីផ្សារសត្វគោ ក្របី ឲ្យប្រជាកសិករដែលជាអ្នកចិញ្ចឹមសត្វផង» ។ ប្រជាកសិករជាអ្នកចិញ្ចឹមក្របី បន្តថា «កន្លងមក សត្វគោ ក្របី រំពឹងទៅលើការលក់ចេញទៅប្រទេសវៀតណាមតែមួយគត់ ដោយគេចូលមកទិញផ្ទាល់ ក៏ប៉ុន្តែចាប់ពីដើមខែវស្សាឆ្នាំ២០២៣នេះ សត្វក្របី មានជំងឺអុតក្តាម សាទឹកមក ឈ្មួញវៀតណាមក៏ឈប់ចូលមកទិញតែម្ដង បង្កឲ្យក្របីលក់លែងចេញ។ ហើយបើសិនជាមានអ្នកទិញ គឺឈ្មួញក្នុងស្រុក គេមកទិញបួនប្រាំក្បាល និងទិញកា.ប់សា.ច់លក់១ក្បាល ឬ២ក្បាលតែប៉ុណ្ណោះ»។ ប្រជាកសិករជាអ្នកចិញ្ចឹមក្របី បន្តទៀតថា «ដូច្នេះ សូមឲ្យរាជរដ្ឋាភិបាលមេតា្តជួយរកទីផ្សារឲ្យប្រជាកសិករផង ដោយបច្ចុប្បន្ននេះ ទីផ្សារសត្វក្របី និងគោ នៅលើពិភពលោក ត្រូវការច្រើន ជាពិសេសមានឈ្មួញនាំសត្វក្របីពីបរទេសឆ្លងកាត់ប្រទេសកម្ពុជា ឆ្លងដែនទៅលក់នៅប្រទេសវៀតណាមរាល់ថ្ងៃ រាប់រយក្បាល ក៏ប៉ុន្តែក្របីប្រជាកសិករខ្មែរ បែរជាគ្មានទីផ្សារ»។ គួរបញ្ជាក់ថា ប្រជាពលរដ្ឋរស់នៅឃុំចម្លង ស្រុកស្វាយជ្រំ ក៏បាននាំគ្នាដេញសត្វក្របីមកឃ្វាលនៅតាមបន្ទាត់ព្រំដែននេះដែរ ដោយមានក្របីប្រមាណជាង២០០ក្បាល ។ ហើយពលរដ្ឋបានដេញក្របីមកឃ្វាលរាល់ថ្ងៃ គឺព្រឹកម៉ោង៨និង១០នាទីដេញចេញពីភូមិមកឃ្វាល លុះដល់ម៉ោង៤រសៀល ទើបដេញក្របីត្រឡប់ទៅផ្ទះវិញ។ បើតាមបុរសខាងលើ និងជាអ្នកឃ្វាលក្របី បានត្អូញត្អែរដែរថា «ចាប់តាំងពីខែមសា ឆ្នាំ២០២៣មក ឈ្មួញវៀតណាមឈប់មកទិញសត្វក្របីពីប្រជាពលរដ្ឋខ្មែរផ្ទាល់ដូចមុន ដោយសមត្ថកិច្ចខាងវៀតណាម គេបិទឈប់ឲ្យនាំសត្វក្របីចូលប្រទេសវៀតណាម»។ បុរសរូបនោះបន្តថា« បច្ចុប្បន្ន គឺមានតែឈ្មួញខ្មែរដើរប្រមូលទិញយកទៅប្រោះទុក (យកទៅបំប៉ន) ក៏ប៉ុន្តែឈ្មួញកណ្តាលខ្មែរយើងទិញថោក ដោយក្របីធំ១ក្បាល តម្លៃ១លាន៥សែនរៀលតែប៉ុណ្ណោះ។ បើប្រៀបធៀបកាលពីឆ្នាំមុន និងដើមឆ្នាំ២០២៣ ក្របីធំ ឬក្របីឡើង.ក ក្នុង១ក្បាលគឺតម្លៃ៣,៥០០,០០០រៀល ទៅ៤លានរៀល ចំណែកក្របីញី គឺតម្លៃ៣លានរៀល ទៅ៣លាន៥សែនរៀល»។ បុរសរូបនោះបន្តទៀតថា «ក៏ប៉ុន្តែបច្ចុប្បន្ន ឈ្មួញវៀតណាមលែងចូលមកទិញផ្ទាល់ មានតែឈ្មួញខ្មែរមកប្រមូលទិញឲ្យតម្លៃថោក ហើយប្រាប់ថា ឈ្មួញវៀតណាម គេផ្អាកទិញក្របី ដោយសារសត្វក្របីស្រុកខ្មែរ ខេត្តស្វាយរៀង ផ្ទុះជំងឺដុំពកលើស្បែក និងកើតជំងឺអុតក្តាម ចាប់ពីខែមេសា ឆ្នាំ២០២៣មក ហើយឈ្មួញខ្មែរដើរប្រមូលទិញនេះ គឺយកទៅប្រោះទុក ព្យាបាល និងបំប៉ន រួចបាននាំចេញទៅប្រទេសវៀតណាម ដោយមានសមត្ថកិច្ចវៀតណាម គេត្រួតពិនិត្យលើសុខភាពសត្វ បើគ្មានជំងឺទើបឲ្យនាំចូលទៅប្រទេសគេ ក៏ប៉ុន្តែបច្ចុប្បន្ននេះ ឈ្មួញវៀតណាមមិនទិញក្របីខ្មែរយើងតែម្តង»។ បើតាមបុរសម្នាក់ទៀតមានអាយុ៧១ឆ្នាំ រស់នៅភូមិតានូ ឃុំចំបក់ ស្រុកស្វាយជ្រំ ក៏បានប្រាប់កោះសន្តិភាពឱ្យដឹងដែរថា «គាត់ចិញ្ចឹមសត្វគោចំនួន២៥ក្បាល និងបានដេញគោមកឃ្វាលនៅជិតព្រំដែនដែរ។ គាត់ចិញ្ចឹមគោក្តាម កាលពីឆ្នាំមុន និងដើមឆ្នាំ២០២៣ ហើយគោឈ្មោល លក់បាន១ក្បាល តម្លៃ១លាន២សែនរៀល ប៉ុន្តែបច្ចុប្បន្ននេះលក់បានតែ១ក្បាល តម្លៃ៨សែនរៀលតែប៉ុណ្ណោះ ។ ចំពោះសត្វគោញីមេក្រមុំ ឬមេកូនវិញ ពីមុន១ក្បាលតម្លៃ១លានរៀល ប៉ុន្តែបច្ចុប្បន្នលក់បានតែតម្លៃ៧សែនទៅ៨សែនរៀលប៉ុណ្ណោះ ក្នុង១ក្បាល ហើយគ្មានអ្នកទិញទៀត គឺមានតែអ្នកទិញកា.ប់សា.ច់លក់ក្នុងមួយថ្ងៃ ១ក្បាល ឬ២ក្បាលតែប៉ុណ្ណោះ»។ ប្រភពដដែលបន្តទៀតថា «អ្នកចិញ្ចឹមសត្វគោក្របី បច្ចុប្បន្ននេះខាតបង់ ដោយសារការចិញ្ចឹមត្រូវចំណាយច្រើន កន្លែងឃ្វាលចង្អៀត ខ្វះស្មៅ ហើយត្រូវទិញចំប៉ើងពីប្រទេសវៀតណាម ដើម្បីយកមកឲ្យសត្វគោក្របីស៊ីទៀត ដោយចំប៉ើង១ដុំ តម្លៃ៥ពាន់រៀលទៅ៧ពាន់រៀលឯណោះ។ ហើយពេលជួបបញ្ហា ផ្ទុះជំងឺដុំពកលើស្បែក សាទឹក ឬអុតក្តាម ក៏ត្រូវការចំណាយប្រាក់ ហៅពេទ្យសត្វឲ្យមកព្យាបាល ថែមទាំងបច្ចុប្បន្ននេះ ឈ្មួញវៀតណាមឈប់មកទិញផ្ទាល់ទៀត គឺពិបាករកទីផ្សារសត្វគោក្របីខ្លាំងណាស់»៕ សម្រួលដោយ ទៀង បុណ្ណរី
