មន្ត្រីជលផលនិងសហគមន៍នេសាទចុះកម្ទេចបទល្មើស តែរកម្ចាស់មិនឃើញ
ខេត្តបាត់ដំបង ៖ មន្ត្រីជលផល និងសហគមន៍នេសាទបានចុះបង្ក្រាបបទល្មើសនេសាទមួយកន្លែងដោយបានកាប់បំផ្លាញចោលសាច់អួនប្រវែងជិត១០០០ម៉ែត្រ កាលពីថ្ងៃទី១៨ តុលា នៅតំបន់ទន្លេសាប ក្នុងភូមិសាស្ត្រ ឃុំព្រៃចាស់ ស្រុកឯកភ្នំ តែមិនស្គាល់អត្តសញ្ញាណម្ចាស់បទល្មើសទេ។ សេចក្ដីរាយការណ៍បានឲ្យដឹងថា មន្ត្រីជលផល និងសហគមន៍នេសាទប្រមាណ១០នាក់ បានចុះបង្ក្រាបបទល្មើសនេសាទនៅតំបន់បឹងទន្លេសាប ក្នុងភូមិសាស្ត្រ ឃុំព្រៃចាស់ ស្រុកឯកភ្នំ ដោយបានកាប់បំផ្លាញចោលនូវសម្ភារបទល្មើសនេសាទ តែគេមិនស្កាល់ម្ចាស់បទល្មើសទេ។ បើតាមរបាយការណ៍បទល្មើសនេសាទដែលត្រូវមន្ត្រីជលផលបង្ក្រាប និងបានកាប់បំផ្លាញចោលរួមមាន៖ សាច់អួនប្រវែង៩០០ម៉ែត្រ បង្គោលឈើចំនួន២២០ដើម ឡុកចាប់ត្រីចំនួន០៤ និងព្រលែងកូនត្រីវិញជាច្រើនគីឡូក្រាម តែរបាយការណ៍មិនបានផ្ដល់អត្តសញ្ញាណម្ចាស់បទល្មើសទេ។ ពាក់ព័ន្ធនឹងបទល្មើសនេសាទនេះ បើតាមប្រភពពីសហគមន៍នេសាទបានឲ្យដឹងថា ពេលនេះជារដូវទឹកឡើងខ្លាំង ហើយបទល្មើសនេសាទក៏សំបូរស្អេកស្កះដែរ មានស្ទើរគ្រប់ទីកន្លែង នៅតំបន់ទន្លេសាប ។ បទល្មើសដែលកំពុងកើតមានច្រើននៅពេលនេះ គឺការដាក់ពង្រាយ«បរណរ៉ាវ» ស្ទាក់ចាប់ត្រីដែលមានប្រវែងរាប់ពាន់ម៉ែត្រ នៅតាមតំបន់ព្រៃលិចទឹក ។ ប្រជាសហគមន៍បានបញ្ជាក់ថា បទល្មើសប្រភេទនេះ ត្រូវបានជនល្មើសចាប់ផ្ដើមកាប់ឆ្ការព្រៃរនាមនៅរដូវប្រាំង រួចពង្រាយសាច់មងដែលច្បាប់ហាមឃាត់ពាសពេញព្រៃតែម្ដង ។ បើតាមប្រជាពលរដ្ឋនៅតំបន់ទន្លេសាបបានបញ្ជាក់ថា បច្ចុប្បន្ន បទល្មើសប្រភេទនេះ កំពុងកើតមានស្ទើរគ្រប់ទីកន្លែង នៅតំបន៊់ទន្លេសាប តែកម្លាំងសមត្ថកិច្ចក៏ហាក់ប្រឹងប្រែងចុះបង្ក្រាបយ៉ាងសកម្មដែរ ប៉ុន្តែបង្ក្រាបបានតែឧបករណ៍ ឬសម្ភារបទល្មើស ។ រីឯជនប្រព្រឹត្តបទល្មើសមិនដែលត្រូវចាប់ខ្លួនបញ្ជូនទៅតុលាការទេកន្លងមកសូម្បីតែម្នាក់ ៕ សម្រួលដោយ ទៀង បុណ្ណរី
